Couple Friendly என்பது காதலை மையமாக வைத்தாலும், வெறும் ரோமான்டிக் கனவுப் பயணம் அல்ல. இன்றைய இளைஞர்கள் வாழ்க்கையில் சந்திக்கும் வேலை இல்லாமை, கனவுகளுக்கான போராட்டம், பொருளாதார அழுத்தம், அதிலிருந்து உருவாகும் மன அழுத்தம் போன்றவற்றை காதலின் வழியே பேசும் படம். ஆயிரக்கணக்கான லவ் ஸ்டோரிகள் வந்தாலும், இந்த படம் தனித்துப் பளிச்சிடுவதற்கு காரணம் அதன் இயல்பான அணுகுமுறையும், நம்மைச் சுற்றி நடக்கும் வாழ்க்கையை பிரதிபலிக்கும் தருணங்களும்தான்.
படத்தின் கதைக்களம் மிகவும் சாதாரணமாக தொடங்குகிறது. படித்த படிப்புக்கு வேலை கிடைக்காமல், வீட்டில் அப்பாவின் ஏச்சு வாங்கி, காதலும் தோல்வியடைந்து வாழ்க்கையில் என்ன செய்வது என்ற குழப்பத்தில் இருக்கும் நாயகன் சிவா. பைக் டாக்ஸி ஓட்டி வாழ்க்கையை ஓட்டும் அவனின் நிலை, இன்றைய பல இளைஞர்களின் பிரதிபலிப்பாகவே தெரிகிறது. அதே நேரத்தில், வேலையைக் கனவாகக் கொண்டு சென்னை வரும் மித்ரா, இண்டர்வூ மேல் இண்டர்வூ சென்றும் வாய்ப்பு கிடைக்காமல் தவிக்கும் நிலை, நகர வாழ்க்கையின் கடின உண்மையை சொல்லுகிறது. இந்த இரண்டு தனிமைகள் சந்திக்கும் இடத்தில்தான் கதையின் உணர்ச்சி பயணம் தொடங்குகிறது.
நட்பாக ஆரம்பிக்கும் இவர்களின் உறவு, மெதுவாக காதலாக மாறும் விதம் மிகவும் இயல்பாக வடிவமைக்கப்பட்டுள்ளது. அதிகமான டயலாக்கள் இல்லாமல், சின்ன சின்ன தருணங்கள், பார்வைகள், சிரிப்புகள் மூலமே காதல் வளர்கிறது. லிவிங்-இன் உறவு என்ற விஷயத்தை எந்த sensational-மும் இல்லாமல், ஒரு வாழ்க்கைச் சூழலாக மட்டும் காட்டுவது படத்தின் முதிர்ச்சியை வெளிப்படுத்துகிறது. இந்த பகுதிகளில் நாயகன்–நாயகி கெமிஸ்ட்ரி மிகப் பெரிய பலமாக மாறுகிறது.
ஒரு கட்டத்தில் சிவாவுக்கு வாழ்க்கையில் பெரிய திருப்பம் கிடைக்கிறது. அவன் கனவு கண்ட வேலை, வெற்றி, பெயர், பணம் என எல்லாம் வர ஆரம்பிக்கிறது. ஆனால் அதே நேரத்தில் மித்ரா அதே இடத்திலேயே நின்று போராடிக்கொண்டிருப்பது, இருவருக்கும் இடையிலான சமநிலையை குலைக்கிறது. இங்குதான் படம் மிக முக்கியமான ஒரு உண்மையை பேசுகிறது – வெற்றி ஒருவருக்கு மட்டும் வந்தால், அதுவே காதலில் ஈகோ, உரசல், இடைவெளி உருவாக காரணமாகிறது. இந்த உரசல்கள் சத்தமாக அல்ல, மெதுவாக, உள்ளுக்குள் கொதிக்கும் உணர்வுகளாக வெளிப்படுவது பாராட்டுக்குரியது.
இரண்டாம் பாதியில் படம் காதலின் இன்னொரு முகத்தை காட்டுகிறது. சாதி பார்வை, குடும்ப அழுத்தம், குழந்தையின்மை தொடர்பான சமூக வலி போன்ற விஷயங்களை கதையின் போக்கிலேயே தொட்டு செல்கிறது. குறிப்பாக பெண்கள் உடல்நலம் மற்றும் குழந்தை தொடர்பான பிரச்சனைகளில் சமூகம் எப்படி ஒருதலைப்பட்சமாக நடக்கிறது என்பதைக் காட்டும் காட்சிகள், கதைக்கு கூடுதல் ஆழத்தை தருகின்றன. இதே நேரத்தில், ஒரு முக்கிய கதாபாத்திரத்திற்கு வரும் நோய் சார்ந்த திருப்பம் சற்று பழகிப்போன டெம்ப்ளேட்டாக தோன்றினாலும், அதைக் கையாளும் விதம் மிக மென்மையாக இருப்பதால் பெரிய சலிப்பை ஏற்படுத்தவில்லை.
டெக்னிக்கல் ரீதியாக படம் மிகவும் நேர்த்தியாக உள்ளது. சென்னை நகரத்தின் லைவ் லொகேஷன் காட்சிகள் படத்திற்கு நெருக்கத்தையும் உண்மைத் தன்மையையும் சேர்க்கின்றன. ஒளிப்பதிவு நகர வாழ்க்கையின் ஓட்டத்தை அழகாகப் பிடிக்கிறது. பின்னணி இசையும் பாடல்களும் எமோஷனல் காட்சிகளை தூக்கிப் பிடிக்க, எடிட்டிங் படத்தின் மென்மையை கெடுக்காமல் அமைந்துள்ளது. தெலுங்குப் படம் என்றாலும், தமிழ் டப்பிங் மிகவும் இயல்பாக இருப்பது இன்னொரு பிளஸ்.
மொத்தத்தில், Couple Friendly என்பது காதலை பெரிய சினிமா டிராமாவாக மாற்றாமல், வாழ்க்கையின் ஒரு பகுதியாகப் பார்க்கும் முயற்சி. சில இடங்களில் யூகிக்கக்கூடிய திருப்பங்களும், முதல் பாதியில் இருந்த கச்சிதம் இரண்டாம் பாதியில் குறைவாக இருப்பதும் குறைகளாக இருந்தாலும், அவற்றை மீறி ஒரு இதமான அனுபவத்தை தருகிறது. காதலில் இருக்கும் ஜோடிகளுக்கும், காதலை வாழ்க்கையின் யதார்த்தத்தோடு புரிந்துகொள்ள விரும்புபவர்களுக்கும், இந்த படம் ஒரு மென்மையான எமோஷனல் ரைட் என்பதில் சந்தேகமில்லை.