இயக்கம் – கார்த்திக் கட்டம்நேனி
நடிகர்கள் – தேஜா சஜ்ஜா, மனோஜ் மஞ்சு, ரித்திகா நாயக், ஷ்ரேயா சரண்
இசை – கவுரா ஹரி
தயாரிப்பு – பியூபில் மீடியா ஃபேக்டரி – விஷ்வா பிரசாத்
கலிங்கப் போரின் இரத்த வெள்ளத்துக்குப் பின், பேரரசர் அசோகன் ஒன்பது புத்தகங்களில் மறைத்து வைத்த ரகசியமே கதையின் மூலக்கரு. காலம் கடந்து, இன்றைய உலகில் அந்த மறைக்கப்பட்ட அறிவை தனது தீய நோக்கத்துக்குப் பயன்படுத்த மனோஜ் மஞ்சு முற்படுகிறார். ஆனால், “மிராய்” என்ற அதிசய சக்தியின் துணையுடன் தேஜா சஜ்ஜா எதிர்த்துப் போராடுவது தான் படத்தின் சுவாரஸ்யமான மையம்.
தேஜா சஜ்ஜா, கதாபாத்திரத்துக்கு பொருந்தியிருக்கிறார். ஆரம்பத்தில் குழப்பத்துடன் இருக்கும் இளைஞன், பின்னர் சக்தி பெற்ற வீரனாக மாறும் அவரது பயணம் நம்ப வைத்தாலும், சில காட்சிகளில் அதிரடி ரொம்பவும் அதிகமாகி அயர்ச்சி தருகிறது.
வில்லனாக மனோஜ் மஞ்சு வலுவாக தன் பாத்திரத்தை வெளிப்படுத்தியுள்ளார். “திறமை மிக்கவர்களே கடவுள்” என்ற அவரது பாத்திரம், கதையை சற்று உயர்த்தினாலும், அவருக்கு இணையான சவால் நாயகனிடம் இருந்து எப்போதும் கிடைப்பதில்லை.
ரித்திகா நாயக் மற்றும் ஷ்ரேயா சரண் தங்கள் பாத்திரங்களில் ஓரளவுக்கு மட்டுமே வந்து போகின்றனர். ஜெயராம், ஜகபதி பாபு, கெட்டப் சீனு போன்றோர் வந்த அளவுக்கு வேலை செய்துள்ளனர்.
கவுரா ஹரியின் இசை படத்தின் முக்கிய பலமாக அமைந்துள்ளது. குறிப்பாக பின்னணி இசை இல்லையெனில் சில காட்சிகள் உயிரோடு தெரியாது. ஒளிப்பதிவில் கார்த்திக் கட்டம்நேனி மிரட்டியுள்ளார்; காட்சிகள் கண்களை வியப்பில் ஆழ்த்தும்.
இயக்குநர் கார்த்திக் கட்டம்நேனி, பழமையும் நவீன காட்சிகளையும் இணைத்த முயற்சி பாராட்டத்தக்கது. ஆனால் அதிக கிராபிக்ஸ் காட்சிகள் சில நேரங்களில் உணர்ச்சியை மந்தமாக்கி, கதையை இரண்டாம் நிலைக்கு தள்ளுகிறது.
முடிவு: ‘மிராய்’ ஒரு காட்சிப் பெருவிழா தான்; ஆனால் கதை சொல்லலிலும் பாத்திர வளர்ச்சியிலும் இன்னும் கவனம் இருந்தால், இது மறக்க முடியாத ஃபேண்டஸி அனுபவமாக மாறியிருக்கும்.