‘ஹார்ட்டின்’ இசை மற்றும் முன்னோட்ட வெளியீட்டு விழா சென்னையில் உற்சாகமாக நடைபெற்றது. டிரைடன்ட் ஆர்ட்ஸ் R. ரவீந்திரன் மற்றும் ஸ்டெப் ஒன் ஸ்டுடியோஸ் தயாரிப்பில், அறிமுக இயக்குநர் கிஷோர் குமார் இயக்கத்தில், நடிகர் சனந்த் கதாநாயகனாக அறிமுகமாகும் இந்த ரொமான்டிக் என்டர்டெய்னர் திரைப்படம் ஜூன் 26ஆம் தேதி உலகம் முழுவதும் திரையரங்குகளில் வெளியாக உள்ளது.
மடோனா செபாஸ்டியன், இமயா டி, வாட்ஸப் மணி, டெப்னிதா கர் உள்ளிட்டோர் நடித்துள்ள இப்படத்திற்கு ராஜேஷ் முருகேசன் இசையமைத்துள்ளார். இசை மற்றும் முன்னோட்ட வெளியீட்டு விழாவில் கலந்து கொண்ட படக்குழுவினர், படத்தின் உருவாக்க அனுபவங்களையும், படத்தின் சிறப்புகளையும் பகிர்ந்து கொண்டனர்.
இயக்குநர் கிஷோர் குமார் பேசுகையில், இது வழக்கமான காதல் கதையாக இல்லாமல், இன்றைய தலைமுறையின் காதல் உணர்வுகளை புதிய கோணத்தில் அணுகும் திரைப்படம் என தெரிவித்தார். “சிச்சுவேஷன்ஷிப், வெக்கேஷன்ஷிப் போன்ற பல புதிய உறவு வரையறைகள் வந்தாலும், காதல் என்ற உணர்வு மட்டும் எப்போதும் மாறாது. அந்த எவர்கிரீன் உணர்வை மையமாக வைத்து இந்தப் படம் உருவாகியுள்ளது” என்றார்.
நடிகை மடோனா செபாஸ்டியன், கதையை கேட்டவுடன் மிகவும் பிடித்ததால் உடனே நடிக்க ஒப்புக்கொண்டதாக கூறினார். “இது ஒரு காதல் கதை தான். ஆனால் இதன் அணுகுமுறை வித்தியாசமானது. ரசிகர்கள் அதை திரையில் உணர்வார்கள்” என்றார்.
இசையமைப்பாளர் ராஜேஷ் முருகேசன், தனது இசைப் பயணத்தில் அதிக சுதந்திரத்துடன் பணியாற்றிய படங்களில் இதுவும் ஒன்று என குறிப்பிட்டார். படத்தில் இடம்பெற்றுள்ள ஐந்து பாடல்களும் கதையுடன் ஒன்றிணைந்து பயணிக்கும் வகையில் உருவாக்கப்பட்டுள்ளதாக தெரிவித்தார்.
ஹீரோவாக அறிமுகமாகும் சனந்த், “முதலில் இது ஒரு சாதாரண காதல் கதை என்று நினைத்தேன். ஆனால் படப்பிடிப்பு முன்னேறியபோது கதையின் பல அடுக்குகளும் ஆழமான உணர்வுகளும் புரிந்தது. இந்தப் படம் ரசிகர்களுக்கு ஒரு அழகான அனுபவமாக இருக்கும்” என்றார். மேலும், படத்தில் இரண்டு கதாநாயகிகளுடன் நடித்த அனுபவத்தையும் பகிர்ந்து கொண்டார்.
படக்குழுவினர் அனைவரும் ஒருமனதாக, ‘ஹார்ட்டின்’ ஒரு ஃபீல்-குட் ரொமான்டிக் திரைப்படமாக மட்டுமல்லாமல், ரசிகர்களின் இதயத்தைத் தொடும் உணர்வுப்பூர்வமான படைப்பாக இருக்கும் என நம்பிக்கை தெரிவித்தனர். ஜூன் 26ஆம் தேதி வெளியாகும் இந்தப் படத்தை குடும்பத்துடன் திரையரங்குகளில் கண்டு ரசிக்குமாறு ரசிகர்களை அழைத்தனர்.