கமலின் ஆளவந்தான் அப்டேட்டா டிஜிட்டலில் ரெடியாகுது!

0
246

கமல்ஹாசன் நடிப்பில் கலைப்புலி எஸ்.தாணு தயாரித்த ‘ஆளவந்தான்’ திரைப்படம் வசூல் ரீதியாகத் தோல்வியடைந்தாலும் கதைசொல்லல் முறை மற்றும் உருவாக்கத்தில் சிறந்த படமாக இப்போதும் பேசப்பட்டுவருகிறது. உலகப் புகழ்பெற்ற ஹாலிவுட் இயக்குநரான குவாண்டின் டொரண்டினோ ஒரு முறை ‘ஆளவந்தான் படத்தில் வரும் காமிக் சண்டைக்காட்சியின் பாதிப்பிலிருந்து தான் தனது Kill Bill படத்தின் உருவாக்கத்தை அமைத்தேன்’ எனக் குறிப்பிட்டிருந்தார்.

அண்ணன், தம்பி என இரு வேடங்களில் கமல்ஹாசன், மனீஷா கொய்ராலா, ரவீனா தண்டன் உள்படப் பலர் நடித்த இந்தப் படத்தைச் சுரேஷ்கிருஷ்ணா இயக்கியிருந்தார். கடந்த 2001ஆம் ஆண்டிலேயே ரூ.20 கோடி பட்ஜெட்டில் தயாரிக்கப்பட்ட இந்தப் படத்தின் பட்ஜெட் இன்றைய மதிப்பில் ரூ.400 கோடி என்பது குறிப்பிடத்தக்கது.

இந்த நிலையில் ‘ஆளவந்தான்’ திரைப்படத்தை டிஜிட்டல் மயமாக்கக் கலைப்புலி எஸ்.தாணு முடிவு செய்துள்ளார். இந்தத் தலைமுறையினர் தவறவிட்ட ஆளவந்தான் படத்தை மிக விரைவில் தமிழகம் முழுவதும் 500 திரையரங்குகளில் வெளியிடத் திட்டமிட்டுள்ளதாகக் கலைப்புலி எஸ்.தாணு கூறியுள்ளார். இந்தப் படத்தின் டிஜிட்டல் பணிகள் இன்று தொடங்கி ஓரிரு வாரங்களில் முடிந்துவிடும் என்று கூறப்படுகிறது. கமல்ஹாசனின் ‘விஸ்வரூபம் 2’ படத்தை எதிர்பார்த்திருக்கும் அவரது ரசிகர்களுக்கு ஆளவந்தானின் டிஜிட்டல் ரிலீஸ் பெரும் மகிழ்ச்சியை ஏற்படுத்தியுள்ளது.